ليلى والذئب على طريقة المحششين

كان يا مكان .. في قديم الزمان
مره ام ليلى سوت كيكه حته تدزها لبيت امها الي ساكنه وحدها
من استوت .. صاحت ليلى ليلى تعاي ودي الكيكه لبيت بيبيتج بسرعه
ليلى : اااهوووو .. شلون طلابه هااااي بكلشي صايحتني .. بعدين هسه دا اباوع تلفزيون طالع مسلسل التركي المدبلج من يخلص اكوم
: ولج كوووووومي !!!!
المهم كامت ليلى وروحها واصله لخشمها .. اخذتها الكيكه بسرعه كبل هي والصحن مالته وراحت تركض حته تلحك علمسلسل التركي
ام ليلى : اوكفي .. خلي اوصيج .. روحي بلدرابين .. مو تمشين بلطريق العدل علشارع العام لانه مسدود ديفككون عبوه زييييييييين؟

ليلى بلطريق كاعده تركض( شلون كاعده وشلون تركض!! مادري بعد) المهم ماسمعت كلام امها وراحت علشارع العام .. فلاكاها الذئب وكالها : ولج وين طالعه بهلعجاج ؟
كالتله :ببيت بيبيتي
وهاي الكيكه المن ؟
كالتله : شنو حضرتك مبين عليك مثخن ... موديه الكيكه لبيت بيبيتي حته انطيها للدجاجه مالتها ... غير لبيبيتي !!
: عله كيفج يابه .. زين ليش بيبيتج اصلا عدها سنون ؟
: شنو هو كيك لو جوز ؟ انت محشش اليوم شنو ؟ يله لا تاخرني ورايه مسلسل تركي عفته ورايه يكون الحك عليه
الذيب :وين صاير بيت بيبيتج ؟
كالتله :دتشوف ذيج الحواجز الكونكريتيه ؟ وراها مو اكو بنايه عليها علم امريكي ؟ صفن الذيب .. وكاللها : معقوله ؟ هاي معسكر مال امريكان يمكن .. متاكده ؟
كالته : يعني هي بيبيتي قابل اتيه بيتها ؟ يله اني مستعجله
الذيب راح من الصفحه اللخ للبنايه عله اساس يريد يسبق ليلى ..بس مد راسه من فوك الحواجز راسا تلكته القناصات والبنادق .. والله خلصه منها وانهزم .. كال : هيجي تسوين بيه ليلى ؟ بسيطه اني اعلمج ..

راح وتبع خطواتها .. الى ان وصل لمنطقه معزوله ما بيها بس بيت واحد .. اييييييي هذا بيت بيبيتها ..راسا ركض للبيت قبل ليلى وطب من الباب الوره علسريع حط بيبيتها العجيزه بلكونيه وره ما حط بلاستر عله حلكها.
لبس ملابس بيبيتها ونظاراتها وتغطه بلفراش
وصلت ليلى ركض وبدون ما تدك الباب فتحتها وحطت الكيكه عله الـ ميز وصاحت : بيبي هاي كيكه ماما .. يله اني رايحه بااااي
الذيب غير نبرة صوته عله اساس هو بيبيتها
الذيب : ويييين .. ليـ . . ليــ .. لـــيـــــلى ..تعااااي اني مر... مر ييييييضه
ليلى : اهووو هم كامت اتعتعت جنها برازيلي من تحمه.. بيبي مو المدبلجه رح تخلص
تعجب الذيب .. هاي مره عجوز وهيج تسوون بيها .؟
: تعاي ليلى .. لا تروحين بس باوعي عيوني .. مدتشوفيها كبار ؟
: الله يحفظ صحتج وعافيتج اكثر واكثر .. اكو شي بعد ؟ الذيب ضاج بعد اكثر وانقهر عله البيبي
الذيب: دااوكفي .. شوفي اذانتي صايرات طوال
:بيبي .. عادي حته جدو الله يرحمه دائما جان يكول هيج من يتعارك وياج
:دشوفي خشمي شون كبران ؟ مو صحيح ؟
:بيبي .. هو منين جبنه خشمنه الي يلعب نفس ؟ غير منج ؟ و ذيج مرايه بلمجر يم راسج باوعي نفسج براحتج يله اريد اروح
الذيب وصلتله لهنا ... كال ويه روحه شنو هاي ليلى هيج ويه بيبيتها ؟؟؟ مع الاسف
:اوووكفي ليلى .. شوفي سنوني شكد كبار .. حته ااااكلــــ ..
: اي والله صدك كبار.. وهذا الذيب الزوج يكولي منيلها سنون !! يله رايحه علمدبلج لوما طلعت دعايه ماجان جيت
طلع الذيب من الفراش ونزع مناظر وكام يصيح ودموعه بعينه :
:والله ذبحتينه بلمدبلجه والتركيه . هيجي تعاملين بيبيتج ؟ هيجي الاخلاق ؟ اني الذيب وبيبيتج ذيج اني حطيتها بلكونيه حته اكلج
ليلى : شنووو .؟ هسه تروح تطلعها وترجعها بلفراش كبل ما ابيس بيك .. يـلـــــــه ..متبطل من سوالفك هاي ؟ ؟ متستحي هاي مراه بكد بيبيتك .. يله رايحه اني دير بالك عليها .. وراحت ليلى والذيب طلع ال بيبي من الكونيه ورجعها بلفراش و بده يطعمها كيك بيده
باوعتله الــ بيبي وكالت له : الــــلـــه .. تدري انته احله من المرحوم!!!!!ههههههههههههه

ههههههههههههه
والله من جد حلوه
اول مرة اسمع قصة ليلى بلهجه العراقية